Matene de la 17-a de junio, dum la Internacia Librofoiro de Pekino, estis lanĉita la portugallingva eldono de la libro Ekologia Perspektivo de la Ĉina Modernigo, verkita de la ekonomikisto Zhang Yongsheng, ĝenerala direktoro de la Instituto de Studoj pri Ekocivilizacio de la Ĉina Akademio de Sociaj Sciencoj.

Ĉi tiu verko estas la unua el serio de ses libroj titolita Ses Perspektivoj de la Ĉina Modernigo, lanĉita en 2023 de Chongqing-a Eldonejo. Ĝi estas tradukata kaj publikigata en Brazilo danke al partnereco kun la Fondaĵo Maurício Grabois.

Organizita de la fama esploristo Jiang Hui, fakulo pri socialismo kun ĉinaj trajtoj kaj eksa vicprezidanto de la Ĉina Akademio de Sociaj Sciencoj, Ses Perspektivoj de la Ĉina Modernigo estas la unua ĉina libroserio dediĉita al sistema interpreto de la ĉina modernigo, el ses dimensioj, en simpla kaj didaktika maniero.

Krom la ĵus publikigita Ekologia Perspektivo de la Ĉina Modernigo, estas antaŭvidita la traduko kaj publikigo de la ceteraj titoloj: Civilizacia Perspektivo de la Ĉina Modernigo, Historia Perspektivo de la Ĉina Modernigo, Perspektivo pri la Mondkoncepto de la Ĉina Modernigo, Perspektivo pri la Valoroj de la Ĉina Modernigo kaj Demokratia Perspektivo de la Ĉina Modernigo.

"La tutmonda publika opinio ankoraŭ estas dominata de simplisma ekvacio, kiu egaligas modernigon al okcidentiĝo, kaj multaj landoj miskomprenas la disvolvan vojon de Ĉinio. Disponigante ĉi tiun kolekton al la mondo, ni celas prezenti aŭtoritatan, alireblan kaj objektivan klarigon pri la teoriaj fundamentoj kaj la praktikoj de la ĉina modernigo," klarigis, dum sia parolo, Li Bingren, membro de la Partia Komitato kaj vicĝenerala direktoro de Chongqing-a Xinhua-a Publishing Group.

Siavice, Walter Sorrentino, prezidanto de la Fondaĵo Maurício Grabois, emfazis la gravecon de la brazila eldono de Ekologia Perspektivo de la Ĉina Modernigo: "Ĉi tiu verko en la portugala lingvo vastigos la atingon de la debato pri modernigo en Brazilo, antaŭenigante koĥeran pripensadon pri la rilato inter ekonomia evoluo, nacia suvereneco, ŝtata planado, socia egaleco kaj media daŭripovo."

Per la iniciato publikigi ĉi tiun libroserion en la portugala, la eldonistoj esperas oferti aron da referencaj verkoj al brazilaj legantoj, kiuj volas kompreni la ĉinstilan modernigon.

Raportis: Rafael Henrique Zerbetto

Facebook: Ĉina Fokuso / China Focus - Esperanto

Twitter: El Popola Chinio

WeChat: Skani la du-dimensian kodon por legi EPĈ en WeChat