Tajĝiĉjŭan estas unu el la specoj de la ĉina luktarto. Laŭdire ĝi estis kreita de Chen Wangting de Wenxian-gubernio, Henan-provinco en la fino de Ming-dinastio (1368-1644). Post pli ol 300 jaroj tajĝičjŭan disvolviĝis kaj formiĝis en kvin ĉefajn skolojn, kiuj havas komunajn karakterizaĵojn en siaj movoj, sed diferencas inter si en teniĝo kaj fortuzo.
La simpligita tajĝiĉjŭan, ofte prezentata nuntempe, estis rekomendita de la Sporta Komisiono de la Ĉina Popola Respubliko al tuta Ĉinio en la pasintaj kvindek jaroj. Ĝi kun movoj facilaj konservas la fundamentan karakteron kaj efikon de la arto. La konstanta ekzercado per tajĝiĉjŭan utilas al homa sano.
La praktikado en la lastaj jarcentoj pruvis, ke tajĝiĉjŭan estas grava rimedo por sanigo kaj preventado de malsanoj. Multaj opinias, ke krom plifortigo de la korpo, ĝi ankaŭ donas tre bonan efikon por kuraci hipertension, ulceron, kormalsanon, ftizon ktp. Utiligo de sportoj por preventi kaj kuraci malsanojn, kiun oni neglektis en la pasinteco, nun estas aplikita en la klinika praktiko kaj ĝenerale rekonata kiel necesa rimedo en la kuraca proceso. Tial estas sendube, ke tajĝiĉjŭan multe helpas en la kuracado de kelkaj malsanoj.
La fakto diras, ke Ĉinio estas lando, kiu plej frue uzis sportojn por preventi kaj kuraci malsanojn. En la plej frua medicina verkaĵo de Ĉinio troviĝas jenaj vortoj: "La malsano ofte prezentiĝas sub simptomoj de malforteco, sveno, febro kaj malvarmo, kaj ĝia plej bona kuracmetodo estas ekzercado de gimnastiko." Krome, ĉinaj antikvaj sciencistoj eksplikis per sciencaj teorioj la kaŭzon, kial sportoj helpas fortigi la korpon kaj kuraci malsanojn. Antaŭ 1 800 jaroj la fama kuracisto Hua Tuo kreis sanigan gimnastikon "Ludoj de Kvin Birdoj" kaj asertis, ke ofta movado de la korpo faciligas digestadon, akcelas la sangan cirkuladon kaj eliminas ĉiajn malsanojn. Homo en konstanta movado ne malsaniĝas, same kiel pordakso neniam putriĝas.
Tio montras, ke la korpa ekzercado havas aktivan signifon en preventado kaj kuracado de malsanoj. Tajĝiĉjŭan postulas ne nur movadon de ĉiuj muskoloj kaj artikoj de la tuta korpo, sed ankaŭ egalritman profundan spiradon, movadon de diafragmo kaj precipe altan koncentradon de la spirito. Tio havas bonan efikon por akceli la funkcion de la centra nerva sistemo, kaj tiel plibonigas ankaŭ la funkcion de aliaj organoj.
En 2020 tajĝiĉjŭan estis enlistigita kiel monda nemateria kultura heredaĵo de Unesko.
En 2025 la tajĝiĉjŭan-grupo de IKEF vizitis Rusion por fari kulturan interŝanĝon en Rusiaj Esperanto-Tagoj kaj instruis la arton ĉe la kunvenejo. (fotoj faritaj de Jiao Xiyang)
Redaktoro: Xie Ruifeng
Facebook: Ĉina Fokuso / China Focus - Esperanto
Twitter: El Popola Chinio
WeChat: Skani la du-dimensian kodon por legi EPĈ en WeChat