Suzhou-stila brodarto estas unu el la reprezentaj skoloj de ĉina brod-metiarto, kun historio de pli ol 2 000 jaroj. La urbo Suzhou de la provinco Jiangsu estas la hejmurbo de suzhou-stila brodarto, kie estas miloj da brodistoj. Yao Jianping, ĉina metiarta majstrino kaj reprezenta heredanto de la ŝtat-nivela nemateria kultura heredaĵo suzhou-stila brodarto, estas unu el ili. Dum jardekoj, ŝi okazigis ekspoziciojn, paroladojn ktp kaj multfoje vizitis Eŭropon kaj Usonon por disvastigi la arton kaj la tradician kulturon de Ĉinio.

Yao Jianping naskiĝis en brodista familio en Zhenhu-distrikto de Suzhou. Kiam ŝi estis ok-jara, influita de sia patrino, ŝi prenis la brodpinglon kaj sekvis siajn patrinon kaj kuzinon en praktikado de la metiarto. En la aĝo de 12 jaroj, ŝi jam kapablis sendepende fini broditan kravaton. Ĝis nun ŝi neniam forlasis la metiarton.

Dum la pasintaj pli ol 30 jaroj, Yao Jianping ne nur heredis la tradiciajn teknikojn akumulitajn en pli ol 2 000 jaroj, sed ankaŭ kreis unikan faradon, kiu integras la stilojn, strukturojn, kolorojn kaj aliajn elementojn de pentrado kaj fotografio, emfazante la naturan transiron de lumo kaj ombro, prezentante la riĉecon de koloroj. La temoj de ŝiaj verkoj kaptas la trajtojn de la tempo.

Ekde 1999 Yao Jianping estis multfoje invitita fari kulturajn interŝanĝojn eksterlanden. Unu el ŝiaj verkoj estas konservata de la Palaco Buckingham kiel landa donaco, kio sukcese alportis la brodarton al la Okcidento. Por antaŭenigi la disvolviĝon de la metiarto, enkonduki kaj kultivi rilatajn talentulojn en Suzhou, Yao Jianping fondis esplorinstituton kaj studion por ke pli da junuloj komprenu kaj lernu tiun metiarton.

Lastatempe la studio de Yao Jianping per AI "tridimensigis" plurajn el ŝiaj verkoj kaj vivece prezentis ilin en filmeto. En intervjuo Yao Jianping diris: "Tradicia kulturo alfrontas defiojn kaj ŝancojn en ĉiu epoko. Ni devas rigardi al pozitiva direkto, vastigi novan spacon por trovi niajn proprajn ŝancojn kaj vivspacon." Ŝi scias, ke la plej grava afero por la heredado estas homoj. "Ni altiras gejunulojn partopreni en la metiarto, ili estas ne nur junaj brodistoj, sed ankaŭ dezajnistoj, retej-funkciigistoj ktp... La heredado de nemateria kultura heredaĵo bezonas talentojn de novaj rondoj."

Facebook: Ĉina Fokuso / China Focus - Esperanto

Twitter: El Popola Chinio

WeChat: Skani la du-dimensian kodon por legi EPĈ en WeChat