Guĉino estas ĉina sepkorda pluk-instrumento. Ĝi estas ludata ekde antikveco, kaj tradicie ĝi estas ŝatata de akademiuloj kaj literaturistoj kiel instrumento de granda subtileco kaj rafineco, kaj ankaŭ asociita kun la antikva filozofo Konfuceo. Ĝi estas foje nomata de ĉinoj "la patro de ĉina muziko" aŭ "la instrumento de saĝuloj". Guĉino en la koncepto de ĉinoj estas la plej respektata el ĉiuj ĉinaj muzik-instrumentoj. Ĝi havas historion de ĉirkaŭ 5 000 jaroj, kaj ĝiaj legendaj figuroj rilataj al la ĉina prahistorio estas dieca Fuxi, Shennong kaj Huang Di, la Flava Imperiestro. Ĝi estas menciita en ĉinaj skribaĵoj antaŭ preskaŭ 3 000 jaroj, kaj instrumentoj estis trovitaj en tomboj antaŭ ĉirkaŭ 2 500 jaroj.

Guĉino estas kvieteca instrumento, kun gamo de ĉirkaŭ kvar oktavoj, kaj ĝiaj malfermaj kordoj estas agorditaj en la basa registro. Ĝia plej malalta tonalo estas ĉirkaŭ du oktavoj sub meza C, aŭ la plej malalta noto sur violonĉelo. Sonoj estas produktitaj per plukado de malfermaj kordoj, haltigitaj kordoj kaj harmonikoj. Laŭ tradicio, guĉino origine havis kvin kordojn de la antikva ĉina muziksistemo, sed oni trovis similajn antikvajn instrumentojn kun nur unu aŭ pluraj kordoj. Ĝia moderna versio havas sep kordojn.

Ekzistas pli ol 3 360 konataj kaj daŭre ludataj muzikaĵoj de guĉina muziko el antikveco kaj imperiaj dinastioj. La 7-an de novembro 2003, UNESKO anoncis, ke la ĉina guĉino estis elektita kiel nemateria kultura heredaĵo. En 2006 guĉino estis enlistigita naci-nivele en la listo de nemateria kultura heredaĵo de Ĉinio. En 1977 registraĵo de guĉina muziko "Fluanta Akvo" estis elektita por Voyager Golden Record, orumita diska registraĵo enhavanta muzikon el la tuta mondo, kiu estis sendita en la kosmon de NASA per la kosmoŝipoj Voyager 1 kaj Voyager 2. Ĝi estas la dua plej longa eltiraĵo sur la disko. La kialo elekti verkon luditan per ĉi tiu specifa instrumento estas: La tona strukturo de la instrumento kaj ĝia muzika gamo devenas de fundamentaj fizikaj leĝoj rilataj al vibrado kaj suprotonoj, reprezentante la intelektan kapablon de homoj pri ĉi tiu temo.

Do, bonvolu ĝui la fragmenton de guĉina muziko "Fluanta Akvo"!

Facebook: Ĉina Fokuso / China Focus - Esperanto

Twitter: El Popola Chinio

WeChat: Skani la du-dimensian kodon por legi EPĈ en WeChat