Flugroboto liveris telefonajn servojn
Lastatempe Ĉinio sendis flugroboton por restarigi komunikajn servojn en pluraj partoj de la provinco Henan, kiu estis severe trafita de pluvego. Inundo detruis gravajn infrastrukturojn kaj komunikaj signaloj estis interrompitaj.
Posttagmeze de la 21a de julio la flugroboto Yilong-2H ekflugis de la anshun-a flughaveno en la provinco Guizhou. Post naŭ-hora flugo de ĉirkaŭ 1 200 kilometroj, ĝi atingis la urbeton Mihe de la provinco Henan kaj ĉirkaŭflugis super la inunditaj urbetoj kaj vilaĝoj por liveri komunikajn servojn al homoj uzantaj la reton de la kompanio Ĉina Movebla Komunikado.
Post kiam la portempa reto estis starigita, la kompanio elsendis tekstan mesaĝon por informi, ke oni kaptu la ŝancon kontaktiĝi kun familianoj kaj raporti pri sia stato.
Dum kvin horoj, la flugroboto liveris al 3 572 homoj servojn telefonan aŭ interretan. Post tio, la flugroboto uzis siajn optikajn aparatojn kaj radaron por detekti aliajn detruitajn lokojn en la provinco kaj fari mapon.
Li Yidong, ĉefdezajnisto de la flugroboto, diris: "La flugroboto povas plenumi diversajn kriz-respondajn taskojn, ekzemple signal-relajso, aera mapado kaj monitorado kaj liverado de materialoj per paraŝuto."
Redaktoro: Liu Zijia
Facebook: Ĉina Fokuso / China Focus - Esperanto Mojosa Ĉinio
Twitter: El Popola Chinio
WeChat: Skani la du-dimensian kodon por legi EPĈ en WeChat
