Ĉinio havos la plej grandan refraktan teleskopon de la mondo
En la Tibeta Aŭtonoma Regiono de Ĉinio, ĉinaj sciencistoj laboras por starigi la plej grandan refraktan teleskopon en la mondo.
La konstruado de la optika teleskopo kun unu-metra aperturo, jam komenciĝis en la regiona ĉefurbo Lasao, diris Wang Junjie, vicdirektoro de la regiona fako pri scienco kaj teknologio.
Pro sia alteco kaj klara ĉielo, Tibeto estas unu el la plej bonaj lokoj en la mondo por observi ĉielajn korpojn.
Refrakta teleskopo estas instrumento, kiu uzas kombinaĵon de lensoj por produkti bildojn de malproksimaj objektoj en la spaco, kiuj ne estus videblaj nudokule.
Wang klarigis, ke sciencistoj uzos la teleskopon por observi la ĉielon, inkluzive de monitorado de asteroidoj proksimaj al la Tero.
Gvidata de la Nacia Astronomia Observatorio sub la Ĉina Akademio de Sciencoj, la projekto pri la teleskopo ankaŭ entenas popularigon de astronomio. Sciencistoj povos uzi interreton por montri bildojn, filmetojn kaj interagajn rimedojn el la unika perspektivo de la granda teleskopo.
Laŭ Wang, la unu-metra refraktilo estos muntita sur planita regiona planetario, kies konstruado probable komenciĝos ĉi-jare. Ĝi estos la plej alta astronomia observatorio de la mondo post finkonstruado.
Tradukis: Rafael Henrique Zerbetto
Fonto: GICExpat
Facebook: Ĉina Fokuso / China Focus - Esperanto Mojosa Ĉinio
Twitter: El Popola Chinio
WeChat: Skani la du-dimensian kodon por legi EPĈ en WeChat
