Ĝenerala direktoro de MKO: Kial ni pli bezonas MKOn ol antaŭe?
Nuntempe la monda komerco estas minacata. Tio ne nur kaptas nian atenton, sed ankaŭ postulas nian reagon.
Komerca bariero rompos dungadon kaj ekonomian evoluon
Laŭ statistiko de Monda Komerca Organizo (MKO), limigaj komercaj politikoj pri tarifoj kaj kvoto, kaj pli intensa dogana regado evidente pliiĝis dum la pasinta duonjaro. La situacio estas tre serioza. Se tiu situacio pli malboniĝos, ĝi kaŭzos pli malbonan influon sur ekonomio kaj malebligos dungadon kaj ekonomian evoluon de ĉiuj landoj, precipe la plej malriĉaj.
La tuta mondo havas respondecon trakti tiun defion. Mi daŭre konsiliĝas kun registaraj gvidantoj de diversaj landoj kaj tiuj de la mondo, por urĝi mildigi la nunan komercan streĉitecon per dialogo. Krome, mi kontaktas parlamentojn, komercistojn, pensfabrikojn kaj amaskomunikilojn por ke homoj konsciiĝu pri la riskoj.
Iusence, delonge estas la diskuto pri fortigo de MKO. En lastaj jaroj, mi kaj miaj kolegoj por tiu celo klopodas, kaj ni jam ricevis esencan progreson. Tamen tio ne sufiĉas, ĉar ankoraŭ multaj laboroj atendas nin, multaj gravaj aferoj rilataj al ekonomiaj kresko kaj disvolviĝo necesas pli da diskutadoj.
La solva sistemo de MKO por disputoj alfrontas defion
Kiam membroj de MKO diskutas pri la supraj problemoj, ni ankaŭ devas forigi la minacon alfrontatan de la solva sistemo de MKO por disputoj. Nuntempe 98% de tutmonda komerca sumo apartenas al la 164 membroj de MKO, al kiuj la solva sistemo de MKO por disputoj multe kontribuas. Per tiu sistemo membroj plendas pri senrajteco, protektas siajn interesojn, kaj evitas pliiĝon de komercaj konfliktoj. Do tiu sistemo estas unu el la gravaj fundamentoj por regada sistemo de monda ekonomio.
Kvankam la solva sistemo de MKO bone funkcias kaj la postulo pri ĝi pliiĝas, tiu sistemo alfrontas seriozan defion pro tio, ke Usono faris demandojn pri decidoj kaj proceduroj de la apelaciejo, kiu respondecas pri ekzameno de disputoj, kaj la nomumo de ĝiaj membroj estas blokita.
Kunlaboro estas garantio de ekonomio
Nia mondo pli bezonas MKOn ol antaŭe. Sen ĝi, nia estonteco estos plena de necerteco, kaj komercaj militoj, malalta kresko, malalta enspezo, senlaboreco... tiaj problemoj disvastiĝos tutmonde. Ĉiu lando, ĉu malforta, ĉu forta, ne devas pensi nur pri sia perfektiĝo. Ni devas fortigi internacian komercan kunlaboron, ĉar tio estas bona por ĉiuj ekonomioj.
La aŭtoro estas Roberto Azevêdo, ĝenerala direktoro de Monda Komerca Organizo
Redaktoro: Zhao Wenqi
Ipernity: El Popola Chinio
Facebook: EPC El Popola Chinio
Twitter: El Popola Chinio
WeChat: Skani la du-dimensian kodon por legi EPĈ en WeChat
